Chenglap's Blog

好耐之前, 有件鬍鬚佬, 他到處去搞d龜, 搞到隻龜縮埋個頭, 就會變成個龜板. 鬍鬚佬可以利用個龜板, 去打擊敵人, 同賺取金幣. 而且, 條鬍鬚佬仲會食真菌, 食完之後變到老練咁大, 又可以食d好似草藥既植物, 食完即可迫身體d虛火迫出來, 直頭係個手掌射粒火球咁. 聽完以上既你聯想起d乜呢?

你無估錯, 我講既係一個好經典既電視遊戲, 呢個遊戲就正是被香港人稱為「孖寶兄弟」既瑪利奧兄弟. 此遊戲超級架勢, 相信你即使無玩過, 都聽過.

佢係一個個日本任天堂推出既遊戲, 於一九八七年搞左個叫「超級瑪利奧世界」, 然後就旋即瘋魔全球, 最後搞到同系列出好多個. 俗話都有講啦, 寧欺白鬚公, 莫欺鬍鬚佬, 兩條穿工人褲的中年鬍鬚佬, 竟然係全世界最賺錢既遊戲品牌, 呢兩架其貌不揚既麻甩佬, 佢地的受歡迎程度, 完全頂得住果隻比卡超. 咁孖寶兄弟成功既原因係咩呢? 我估就係在於其保留幾個重要元素啦, 例如鬍鬚佬呀, 龜板呀, 食草藥會迫d虛火出黎呀咁.

任天堂靠以上元素, 賺到豬籠入水, 亦變左世界上最富影響力既遊戲廠商之一. 不過呢期唔算好順利, 手機市場成長得好快, 或多或少都影響左「老任」, 任天堂既股價, 由金融風暴前七十美金, 去到今日只剩五份一, 二零一二年仲首次出現虧損. 不過呢個世界風水輪流轉, 任天堂勝在彈藥夠, 諗到好橋, 過幾年一個屈尾十又掂番都好自然.

呢個世界無獨有偶. 所謂日本有個任天堂, 香港都有個海乜堂, 我自己經常塔巴士都可以睇到有佢地既廣告, 跟任天堂一樣有鬍鬚佬當主角, 十分幽默盞鬼. 唔知係巧合定係點, 大家一樣係鬍鬚佬做招牌, 用龜板賺錢, 仲有土茯苓可以幫你降火. 喂, 點解咁似? 老老實實, 我都唔知點解.

不過始終有一點唔同既, 就係真菌, 真菌呢樣野幫任天堂發達. 但對香港果個就相反. 雪上加霜, 星期五走過路邊書報攤, 見到兩個大頭條, 搞到話又退貨又盛. 一時之間都幾多風雨.

但呢個世界有危就有機, 又係果句, 塞翁失馬, 焉知非福呢. 可能呢個正正係任天堂向中華市場踏出一步既好機會都唔定喎? 既然大家都多事之秋, 更加應該搞下新意思沖喜下, 合作出番隻 game, 用番鬍鬚佬做主角, 照樣踩下d龜板, 至於朵花以後就叫土茯苓, 食左就會清熱降火, 直頭將d虛火排左出去. 唔好覺得無厘頭, 呢期就係興 crossover.

如果真係咁樣做, 甚至可以順勢出埋龜苓膏, 釀個品牌上去, 賣晒全世界. 將龜苓膏呢種文化推廣出去全世界, 將香港文化發揚光大. 都咪話唔得. 日本人一向都好鐘意香港文化, 可能玩下手, 會將龜苓膏變左日本既潮食都唔定添呀.